Б.Дэжид: УИХ-ын гишүүн Б.Чойжилсүрэнгээс эхлээд гуйна. Дараа нь бас өөр аргаар тэмцэнэ шүү


2019-01-09 13:04:51

Өмнөговь аймгийн Гурвантэс сумын иргэд УИХ-ын гишүүн Б.Чойжилсүрэнд хандан мал, малын махаа зарж зардал хийж хэвлэлийн бага хурал хийлээ. Тодруулбал, тус сумын Тост Тосон Бумбын нурууны үргэлжлэл Хөвд, Хуршуутын баян бүрдэд уул уурхайн ажил эхлүүлсэн “Сауд гоби Коал транс” компанийн үйл ажиллагааг хууль бус хэмээн үзэж, үйл ажиллагааг зогсоохыг шаардан мэдээлэл хийсэн юм. Тус сумын ИТХ-ын төлөөлөгч Б.Дэжид "Манай сум Монгол Улсын хамгийн том сум. Сэлэнгэ аймгийн 10 гаруй сумтай тэнцэх хэмжээний тийм том газар нутагтай. Манай суманд уул уурхайн ажил эхлээд 18 жил болж байна. Бид анх уул уурхай сум орон нутгийг минь хөгжүүлнэ хэмээн хүлээн авч дэмжсэн хэдий ч одоо сум бүхэлдээ экологийн гамшигт байдалд хүрсэн. Иргэдийн эрүүл аюулгүй орчинд аж төрөх эрх бүхэлдээ зөрчигдөж байна. 2006 оноос 2016 оныг хүртэл хөөцөлдөж Тосон Бумбын нурууны 880 мянган га газрыг Улсын тусгай хамгаалалтад авахаар болсон. Ингээд Засгийн газар улсын тусгай хамгаалалттай газрын хил заагийг нарийвчлан тогтоогоогүй байтал сонгууль болсон. Сонгуулийн дараа байгуулагдсан Засгийн газар улсын тусгай хамгаалалттай газрын хилийн заагийг 730 мянган га газраар баталсан. 150 мянган га газар алга болчихсон. Алга болсон 150 мянган га газар буюу Хөвд, Хуршуутын баян бүрдэд УИХ-ын гишүүн Б.Чойжилсүрэнгийн “Сауд гоби Коал транс” компани лиценз олгосон. Хуршуут гэдэг газар маань уг нь социализмын үеэс газар тариалан эрхэлж сумын хүнсний ногооны хэрэгцээг хангадаг байсан газар. Сумын маань баянбүрд, эх орныхоо хормойг битгий сүйрүүлээч ээ гэж УИХ-ын гишүүн Б.Чойжилсүрэнгээс гуймаар байна. Бид эхлээд гуйна. Дараа нь бас өөр аргаар тэмцэнэ шүү" хэмээн тайлбарлав.

Мөн тус сумын иргэдийн төлөөлөл "Бид Тост Тосон Бумбын нурууны үргэлжлэл Хөвд, Хуршуутын баян бүрдэд уул уурхайн ажил эхлүүлэхгүй байхаар 2008 оноос хойш тэмцсэн ч амжилтад хүрсэнгүй. Манай суманд Алтайн нурууны үргэлжлэл салбар уулс байдаг. Сумын хойно, урд талд уурхайн ажил эхэлж, сум ундны цэвэр усгүй болох эрсдэл үүсээд байна. 2004 оноос хойших хугацаанд 14 булаг шанд ширгэж үгүй болсон. Худгуудын ус шавхагдсаны дараа хоёр цаг орчим болоод буцаад устай болдог байсан бол одоо 24 цаг болсон ч устай болохгүй байна. Өнгөний ус ширгэж, дээрээс нь гурван ч уурхай гүний усаар нүүрс угааж байна. Үндсэндээ манай сум усгүй боллоо. Манай сумын улаан тоос, түүрэн Улаанбаатарын утаанаас илүү болж, говь маань цөл боллоо. Үүнийг анхаарч үзээч ээ хэмээн төр засгийнхнаас хүсэж байна. Гурван тэс сумын газар нутгийг иргэд биш гадныхантай нийлсэн луйварчид мэддэг болсон. Хууль хэрэгжихгүй байгааг жишээгээр тайлбарлая. Уул уурхайн компаниуд нүүрс зөөх замаа тавьчихаад дараа нь замын зөвшөөрлөө авсан байдаг. Одоогоор манай суманд нүүрсний долоо, алтны нэг, чулууны нэг уурхай үйл ажиллагаа явуулж байна" гэлээ.

АНХААРУУЛГА: Уншигчдын бичсэн сэтгэгдэлд Buzznews.mn хариуцлага хүлээхгүй болно. Buzznews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл бичих:




Дээрхи үсгүүдийг бичнэ үү