Ц.Цолмон: УИХ-ын дарга руу орж, хууль тогтоомжийн төслөө өгдөг хууль, эрх зүйн зохицуулалт байхгүй


2019-01-04 13:15:39

УИХ-ын Тамгын газрын Ерөнхий нарийн бичгийн дарга Ц.Цолмон Ерөнхийлөгчөөс өргөн барьсан хуулийн төсөл болон цаг үеийн асуудалтай холбогдуулан сэтгүүлчдийн асуултад хариуллаа.

-Өчигдөр Ерөнхийлөгчийн Тамгын газраас хуулийн төсөл өргөн мэдүүлэх гээд бүрдэл дутуу гэдэг шалтгаанаар хойшилсон уу?

-Тэгсэн. Хууль тогтоолын төслийг боловсруулах, өргөн мэдүүлэхтэй холбоотой харилцааг зохицуулдаг Хууль тогтоомжийн тухай хууль хүчин төгөлдөр үйлчилж байгаа гэж би байнга хэлдэг. Ерөнхийлөгчийн Тамгын газраас манайд хуулийн төслийг ирүүлсэн. УИХ-ын Тамгын газар хуулийн төслийн бүрдлийг хянаж үздэг. Тэгээд тухайн төсөл хуулийн төсөл боловсруулах талаар хуульд заасан шаардлагыг хангасан, холбогдох бусад материалыг хавсаргасан, нэг үгээр бүрдэл нь хангагдсан байна гэж үзвэл өргөн мэдүүлдэг журамтай.

-Хуулийн төслийг УИХ-ын даргад өргөн барьчихлаа. Энэ нь хууль зөрчсөн үйлдэл гэх асуудал байна. Үүнд тайлбар хийхгүй юу?

-Хуулиараа бол УИХ-ын Тамгын газрын Ерөнхий нарийн бичгийн даргад хандах учиртай юм. Улсын Их Хурлын Тамгын газрын Ерөнхий нарийн бичгийн даргад хандана гэдэг нь төслийг Тамгын газрын мэргэжилтнүүд буюу мэргэжлийн хуульчид хүлээн авч үзэж танилцаад шаардлага хангасан гэж үзсэнээр өргөн барьдаг зохицуулалттай. Түүнээс биш шууд Улсын Их Хурлын дарга руу орж, хууль тогтоомжийн төслөө өгдөг хууль, эрх зүйн зохицуулалт байхгүй. Хуулийн дагуу бид бүрдлийг нь хянаж үздэг. Тэгээд болж байна аа гэж үзвэл УИХ-ын даргад хэлээд, УИХ-ын дарга төслийг хүлээн авах тов тогтоодог. Ийм учиртай, хууль, эрх зүйн зохицуулалттай юм. Ерөнхийлөгчийн Тамгын газраас сая төслийг өргөн мэдүүллээ. Бид хянаад бүрдэл хангагдсан гэж үзсэн.

-Хоёр хуулийн төсөл гэсэн мэдээлэл байна, хэдийд хэлэлцэх, хэзээнээс хэрэгжиж эхлэх бол оо?

-Хүний хүсэл зоригоос хамаардаг зүйл гэж байхгүй, бүх юм хуулийнхаа дагуу явах учиртай. Өргөн барьсан хуулийн төслийг Байнгын хороогоор хэлэлцэх эсэхийг нь шийдэх ёстой. Тиймээс Улсын Их Хурлаар хэлэлцэх асуудлын дараалалд оруулсан байх шаардлагатай. Үүний тулд Улсын Их Хурлын даргын зөвлөл хэлэлцэх ёстой. Улсын Их Хурлын бүх үйл ажиллагааг хуульчилж зохицуулсан байдаг учраас хуулийн дагуу асуудал хэлэлцэгдээд явах учиртай.

Нэгэнт өргөн баригдсан учраас энэ хуулийн төслийг хэрхэн хэлэлцэж шийдвэрлэх нь Улсын Их Хурлын бүрэн эрхэд хамаарна. Парламентын сэтгүүлчид та бүхэн сайн мэднэ. Монгол Улсын Их Хурлын тухай хууль гэж байгаа, Улсын Их Хурлын чуулганы хуралдаанаар асуудал хэлэлцүүлдэг дэгийн хууль гэж байгаа. Тиймээс энэ асуудал тэрхүү хуулиудын дагуу шийдэгдэх ёстой.

-УИХ хуралдахгүй байгаа нөхцөлд яах вэ?

-Улс төрийн шаардлага тавьсан байгаа шүү дээ. Хуулиа хэлэлцээд батлах юм бол тавиад байгаа улс төрийн шаардлага арилах байх. Монгол Улсын Ерөнхийлөгч хуулийн төсөл өргөн бариад байна, тийм учраас гишүүд хуралдаа оролцож, чуулган хуралдах болов уу гэж бодож байна

АНХААРУУЛГА: Уншигчдын бичсэн сэтгэгдэлд Buzznews.mn хариуцлага хүлээхгүй болно. Buzznews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл бичих:




Дээрхи үсгүүдийг бичнэ үү