"Алтан тариа" компани гурилын үнийг 30-330 төгрөгөөр нэмжээ


2020-09-15 16:58:28

ШӨХТГ-ын дарга Б.Бат-Эрдэнэ гурил үйлдвэрлэгч, тариалан эрхлэгчдийн төлөөлөлтэй уулзлаа. Улсын хэмжээнд гурил үйлдвэрлэгч 10 орчим аж ахуйн нэгж идэвхитэй үйл ажиллагаа явуулж байна. Өнөөдрийн байдлаар “Алтан тариа” компани гурилын үнээ 30-330 төгрөгөөр нэмсэн нь хяналт шалгалтаар тогтоогдсон.

Энэ нь ижил төстэй үйл ажиллагаа явуулдаг аж ахуй нэгжүүдээс өрсөлдөөний тэгш бус байдал алдагдаж байна гэх гомдол гаргах шалтгаан болж байна. Иймээс бодит байдал дээр гурилны үнэ нэмэгдэх шалтгаан байгаа эсэхийг тодруулахаар гурил үйлдвэрлэгч, тариалан эрхлэгчид, мэргэжлийн холбоодын төлөөллийг оролцуулсан хамтарсан ажлын хэсэг гаргаж, тариан талбайд ажиллахаар болжээ.

Ингэснээр тариалан эрхлэгчид гурил үйлдвэрлэгч аж ахуйн нэгжүүдэд улаан буудайгаа хэдэн төгрөгөөр борлуулж, түүхий эдийн нөөц, үнэтэй холбоотой нарийвчилсан судалгааны дүн гарна. Энэ долоо хоногт ШӨХТГ-аас гурил, талхны үнэтэй холбоотой нэгдсэн дүгнэлтээ Засгийн газарт танилцуулахаар ийнхүү ажиллаж байна.

ШӨХТГ-ын тухайд чиг үүргийнхээ дагуу нэг талдаа хэрэглэгчийн эрх, нөгөө талдаа аж ахуй нэгжүүдийн эрх ашгийг хамгаалах чиглэлд анхааран ажиллаж байна. Гурил, талхны үнэтэй холбоотой хяналт шалгалтын ажил үргэлжилж байгаа ч нэг ч компани, ААН-үүдэд торгууль ногдуулаагүй болно. Уулзалтад “Алтан тариа” ХХК, “Милл хаус” ХХК, Монголын тариаланчдын үндэсний холбоо зэрэг байгууллагуудын төлөөлөл оролцлоо.

АНХААРУУЛГА: Уншигчдын бичсэн сэтгэгдэлд Buzznews.mn хариуцлага хүлээхгүй болно. Buzznews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл бичих:




Дээрхи үсгүүдийг бичнэ үү