COVID-19: Эрүүл мэндийн сайд Д.Сарангэрэл уриалга гаргалаа


2020-03-31 10:31:04

Эрүүл мэндийн сайд Д.Сарангэрэл хэвлэл мэдээллийнхэнд хандан уриалга гаргав. Уриалгад:

Коронавируст халдвар (COVID-19)-ын улмаас дэлхий дахинд 2 тэрбум гаруй хүн гэрийн хөл хорионд байна. Хөл хорио болон тусгаарлалтад байгаа хүмүүс бие махбодь эрүүл байхаас гадна сэтгэлзүйн хувьд эрүүл байх нь чухал гэдгийг ДЭМБ-ын ерөнхий захирал Тедрос Гебрейсус онцлон тэмдэглэлээ.

Энэ цаг үеийг боломж болгон ашиглах, өөрийгөө хөгжүүлэх, сэтгэлээ амар амгалан байлгахад чиглэсэн зөвлөмж, зөвлөгөөг иргэдэд өгөх нь чухал ач холбогдолтой болоод байна. Иймд нийгмийн хариуцлагын хүрээнд хэвлэл, мэдээллийн байгууллага, сэтгүүлч, нийт уран бүтээлчид та бүхнийг Коронавируст халдвар (COVID-19)-аас сэргийлэх, гэртээ болон тусгаарлалтад байгаа хүмүүст зориулан гадаад хэл, иог, бясалгал, дасгал хөдөлгөөн, дуу, хөгжим, ардын уран зохиол, оньсого таавар, уламжлалт тоглоом зааж сургах зэрэг танин мэдэхүй, хөгжөөнт нэвтрүүлэг явуулж, дэлхий нийтийг хамарсан цартахлын үед ард иргэдээ сэтгэлзүйн тэнцвэртэй байдлаа хадгалах, чөлөөт цагаа үр ашигтай өнгөрүүлэхэд хувь нэмрээ оруулахыг уриалж байна.

ХАМТЫН ХҮЧЭЭР ХАЛДВАРААС СЭРГИЙЛЬЕ