АН БҮЛЭГ: Ерөнхийлөгчийн сонгуулийг ажиглах тусгай хорооны төлөөлөгчидтэй уулзав


2021-06-04 14:23:59

УИХ дахь Ардчилсан намын бүлгийн дарга Д.Ганбат, Европын аюулгүй байдал хамтын ажиллагааны байгууллага (ЕАБХАБ)-ын Ардчилсан институт, хүний эрхийн газраас байгуулсан Ерөнхийлөгчийн сонгууль ажиглах тусгай хорооны төлөөлөгчидтэй өнөөдөр уулзлаа.

Уулзалтад тус хорооны дэд тэргүүн Жиллес Сафи, улс төрийн шинжээч Мауро Калво оролцов. Мөн УИХ дахь Ардчилсан намын бүлгийн Ажлын албаны дарга Д.Амарбаясгалан, Эдийн засгийн зөвлөх Р.Даваадорж нар байлцлаа.

Ерөнхийлөгчийн сонгууль ажиглах тусгай хорооны дэд тэргүүн Жиллес Сафи, УИХ дахь Ардчилсан намын бүлгийн дарга Д.Ганбатад цаг гарган уулзаж буйд талархал илэрхийлж, сонирхсон асуултад нь хариулав. Мөн сонгуулийг хэрхэн ажигладаг, сонгууль өнгөрсний дараа гаргадаг дүгнэлтийн талаар тайлбарласан. Түүнчлэн Монгол Улсын Ерөнхийлөгчийн сонгуульд нэр дэвшигчдийн бүртгэлийн явц, сонгуулийн хууль, дахин санал хураалтын онцлог зэргийг тодруулан асууж, харилцан яриа өрнүүллээ.

ЕАБХАБ нь Европ, Америк, Ази тивийн 57 гишүүн оронтой, олон улсын засгийн газар хоорондын хамгийн том байгууллага юм. Европ, Евразийн бүс нутагт мөргөлдөөнөөс урьдчилан сэргийлэх, маргаантай асуудлыг тайван замаар шийдвэрлэхэд дэмжлэг үзүүлэх, зэвсэгт мөргөлдөөнд хүргэж болзошгүй хүчин зүйлсийг саармагжуулахын төлөө ажилладаг байна. Энэ хүрээнд галт зэвсэг, хүний эрх, хэвлэлийн эрх чөлөө, шударга сонгууль, терроризмтэй тэмцэх зэрэг асуудалд анхаарал хандуулж асуудлыг хэлэлцдэг. Монгол Улс 2004 онд ЕАБХАБ-д нэгдэж ажиглагчийн статустай яваад 2012 оноос албан ёсны гишүүн орон болсон билээ.

 

АНХААРУУЛГА: Уншигчдын бичсэн сэтгэгдэлд Buzznews.mn хариуцлага хүлээхгүй болно. Buzznews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл бичих:




Дээрхи үсгүүдийг бичнэ үү