Ц.Батбаяр: Мал сүргийн тоо нэмэгдэж, бэлчээрийн даац хэтэрсэн нь цөлжилтийн үндсэн шалтгаан болж байна


2021-11-10 14:32:26

Ойн салбарынхан гурав дахь өдрөө чуулж байна. Энэ сарын 08-15-ны өдрүүдэд болж ойн салбарынхны үндэсний чуулганы өнөөдрийн хэлэлцүүлэг "Цөлжилт, газрын доройтол" сэдвийн хүрээнд үргэлжилсэн юм.

Хэлэлцүүлгийн эхэнд Ерөнхийлөгчийн Тамгын газрын дарга Я.Содбаатар “Ой салбар 1990 оноос хойш уналттай байна. Энэ салбарын үйл ажиллагаа хаягдаж, дагаад бүтэц зохион байгуулалт нь тодорхой бус явж ирсэн. Үүнийгээ дагаад Монголд ойн салбар гэдэг томоохон салбар гээгдсэн салбар болж орхигдсон байна гэж бид үзсэн. Ийм учраас энэ салбарын чадавхыг сайжруулах, байгаль орчны нэг салбараар дамжуулж байгаль экологийн тэнцвэрийг хангах зайлшгүй шаардлага үүсч байна. Тийм учраас хамгийн түрүүнд бүтэц зохион байгуулалтыг анхаарч ойн агентлаг байгуулж, ирэх 2022 оны нэгдүгээр сарын 1-нээс эхэлж ажиллана.

Үндэсний чадавх энэ салбарт дутагдалтай байна. Бид “Тэрбум мод” үндэсний хөдөлгөөнийг эхлүүлж, 10 жилд тарьж, ургуулахын тулд нэг жилд дор хаяж 100 сая модыг тарих зорилт дэвшигдэж байгаа. Өнөөдөр Монголд зуун сая модны үр суулгац алга байна. Мэргэжлийн байгууллагуудын гаргасан тоогоор энэ жил 9.2 сая үр суулгац бэлдсэн гэсэн. Тийм учраас бид үр суулгацыг 10 дахин нэмэгдүүлэх шаардлага үүсч байна. Ингэхийн тулд эхний гурван жилд үндэсний чадахыг бэхжүүлж, ААН-үүдийг чадавхтай болгох дотооддоо жилд 100 сая мод тарих нь энэ салбарын томоохон зорилт юм.

Амьдралын эх ус. Усны эх мод. Усгүй бол мод ургахгүй. Тийм учраас эхний жил бэлэн байгалийн усны нөөцийг түшиглэх шаардлага бий болж байгаа. Ямар усжуулалтын системүүдийг ашиглах вэ гэдэг асуудал энэ хүрээнд яригдаж байна. Энэ чиглэлээр үйл ажиллагаа явуулдаг БОАЖЯ-ны усны газар, усны судалгааны байгууллагууд, холбогдох байгууллагууд ажиллаж харилцан уялдаа холбоотой ажиллах хэрэгтэй. Мөн хөрс үйлдвэрлэлийн асуудлууд байна. Ихэнх нь Монголд үйлдвэрлэгддэггүй. Тэрбум мод үндэсний хөдөлгөөнийг дагаад гадагшаа мөнгө урсаж болохгүй. Тийм учраас дотоод үйлдвэрлэлүүдээ дэмжих хэрэгтэй гэж үзэж байна.

 Мөн Сэлэнгэ аймагтай холбооой асуудлыг цагдаагийн газарт мэдэгдсэн. Өчигдрийн салбар хуралдааны үеэр шинэ агентлаг байгуулагдвал ойн мэргэжилтэн, нөхөрлөл, хоршоо гээд энэ чиглэлээр ажиллаж байгаа газрууд чадавхитай байна уу, мэргэжлийн байна уу, үйл ажиллагаа явуулж байна уу. Эсвэл ойн нөхөрлөл гэж нэрлэчихээд зулзган мод унагаад байна уу гэдгийг эргэн харж, аттестчлал тогтоохтой санал нэг байгаа. Тийм учраас тарих, ургуулах, услах, арчилгаа хамтдаа явж байгаа. Энэ бол том зорилго, том төсөл. Монголчууд бид нэг зүг, нэг зорилготойгоор харах ёстой. Нэгдсэн ойлголттой болох ёстой” гэлээ.

Байгаль орчин, аялал жуулчлалын дэд сайд Ц.Батбаяр “Ерөнхийлөгч Монгол орны уур амьсгалын өөрчлөлтийг сааруулах, цөлжилт, газрын доройтлыг бууруулах асуудалд онцгойлон анхаарал хандуулж “Тэрбум мод” тарих үндэсний хөдөлгөөнийг  орон даяар өрнүүлж эхлээд байна. Энэхүү хөдөлгөөнийг амжилттай зохион байгуулах, иргэн, аж ахуйн нэгж байгууллагыг идэвхитэй оролцуулах зорилгоор Ерөнхийлөгчийн Тамгын газар, БОАЖЯ хамтран ойн салбарын мэргэжилтэн, докторуудыг хамруулсан дөрвөн салбар хуралдааныг хийж байна.

Манай орон сүүлийн жилүүдэд уур амьсгалын өөрчлөлтийн нөлөөгөөр дулааны улирлын хур тунадасны хэмжээ ихээхэн буурч, хуурайших, цөлжих явц илүү ажиглагдаж, жилийн дундаж температур 2.25 градусаар дулаарч, хур тунадасны хэмжээ 7.3 хувиар буурсан.

2020 онд хийсэн цөлжилтийн үнэлгээгээр нийт нутаг дэвсгэрийн 76.9 хувь буюу 120.3 сая га талбай бүхий газар нутаг цөлжилтөд тодорхой хэмжээгээр өртсөн. Үүний 23 хувь буюу 30 орчим сая га талбай цөлжилтийн нэн хүчтэй, хүчтэй зэрэглэлд хамрагдаж байна.

Сүүлийн 30 жилд мал сүргийн тоо 3 дахин нэмэгдэж, бэлчээрийн даац хэтэрч цөлжилтийн үндсэн шалтгааны нэг болоод байна.  Өнөөдрийн салбар хуралдаанаар цөлжилтийг хэрхэн бууруулах эрдэмтэн, судлаачдын саналыг сонсож, хэлэлцэх, олон улсын туршлага, дэвшилтэт технилогийг хөгжүүлэх, “Тэрбум мод” үндэсний хөдөлгөөнийг амжилттай хэрэгжүүлэх талаар хэлэлцэхээр хуран чуулаад байна” гэлээ.

 

АНХААРУУЛГА: Уншигчдын бичсэн сэтгэгдэлд Buzznews.mn хариуцлага хүлээхгүй болно. Buzznews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл бичих:




Дээрхи үсгүүдийг бичнэ үү