Газын зурваст иргэд зовж шаналж, Израиль довтолгоонд бэлдэж байгаа энэ үед Ойрхи Дорнод “ангалын ирмэг дээр” байна гэж НҮБ анхаарууллаа.
Хэдэн арван мянган палестинчууд агаарын цохилт, Израилийн хуурай замын довтолгооноос зугтахыг оролдсноор Газын зурвас дахь нөхцөл байдал муудсан гэж шинжээчид үзэж байна.
Аравдугаар сарын 7-нд тус бүс нутагт хяналтаа тогтоогоод байгаа Исламын зэвсэгт Хамас бүлэглэлийн урьд өмнө хэзээ ч байгаагүй террорист халдлагын хариуд “агаар, далай, хуурай газраас хамтарсан болон зохицуулалттай цохилт өгөх” үе шаттай довтолгоонд шилжихээр бэлджээ.
Хамас бүлэглэлийн дайралтын үеэр дор хаяж 1400 хүн амиа алдаж, олон хүн барьцаалагдсан гэж Израилийн Батлан хамгаалах хүчин ням гарагт CNN-д мэдээлсэн. АНУ-ын Ерөнхийлөгч Жо Байден “Холокостоос хойших еврейчүүдийг устгасан хамгийн аймшигт хэрэг” гэж тодорхойлсон байна.
Удаан үргэлжилсэн мөргөлдөөн цаашид улам хурцдаж байгаа нь бүс нутгийн хэмжээнд тархах эрсдэл улам бүр нэмэгдсээр байгаа юм. Тиймээс Пентагоноос Иран болон Ливан дахь Хезболла зэрэг Ираны итгэмжлэгдсэн төлөөлөгчдийг саатуулах зорилгоор агаарын тээвэрлэгч болон сөнөөгч онгоцнуудын хоёр дахь эскадрильуудыг бүс нутаг руу явуулах тушаал өгөхөөр бэлтгэж байна.